سوالف عراقية - دوائر الدولة

بقلم: الاعلامي مفيد عباس

يبدو ان حكايتي مع المستمسكات لاتنتهي، وبكل مراجعة لدائرة يُطلب مني مستمسك لايتوقعه حتى ميشيل حايك.

منين اجيبلكم هسه السند مال البيت ؟؟

- خلي يصورولكياها ويدزوه .. واستنسخه؟

- ينفع هيچي شي؟

- اي .. بس بسرعة لان الدوام راح يخلص.

بس امي بالبيت وصغيرة القوم .. خابرت امي

- يمة السند مال البيت موجود؟

- شتسوي بي يمعزّة .. تريد تبيع البيت مال ابوك ؟

- دگولي يا الله يايمة .. دا اراجع دائرة ورادوا السند مال البيت .. بس طلعيه من الكومدي واخذيله صورة.

- ومنيلنا كامرة حتى اخذله صورة قابل اني استوديو الشعب .

- يمة فدوة اروحلچ صيحيلياها لصغيرة القوم الجماعة راح يعزلون.

- ها عمو .. شتريد

- شوفي حبيبة عمو .. اكو ورقة راح تطلعها بيبي اخذيلها صورة ودزيلياها عالواتساب.

- اي عمو .. بس بيش اخذها الصورة

- احترگ عمو .. غير بالتلفون

- تلفون بيبي طابوگة

- لچ فدوة اروحلچ شوفي اي تلفون لاخ

- عندي مالتي .. بس مابي واتساب

- لعد شبي ؟

- بي بس بوتم (تطبيق اسمه Botim)

- ولچ قابل انت گاعدة بقطر حتى عندچ بس بوتم .. امري لالله .. خلي انزله بتلفوني بين ما تاخذين الصورة.

نزلت بوتم من الاب ستور .. واتصلت .. ها ؟؟

- اي اي لحظة

- ولچ فار دمي .. هي صورة

- دزيتها عمو .. شوفها

- ولچ هاي عقد الزواج مال بيبي وجدو

- واني شمدريني غير بيبي انطتنياها

- اي عمو حقچ .. ديالله گوليلها خلي تطلع السند مال البيت

- راحت للمطبخ تگول الجدر راح يحترگ

- لا عمو مو الجدر راح يحترگ .. عمچ راح يحترگ

- اجتي عمو .. بيبي بيبي يگول عمو هذا عقد الزواج مالتچ .. هو يريد السند .

(خلي ينتظر شدعوة هيچي .. سبحان الميغلط)

- هسه عمو هسه ..

وبعد دقيقتين .. يالله عمو دزيته شوفه

فتحت الصورة .. اويلي عليك يابة .. طلع الضمان مال الثلاجة!!

- انطيني بيبي

- هاي يمة بسرعة ترة الجدر على النار .

- يمة الله يخليچ انطيها السند مال البيت .

- واني شمدريني شلون شكله السند مال البيت ؟

نسيت اني امي متعرف تقرا وتكتب .. انطينياها لهاي المگموعة .. شوفي عمو .. اكو بالورقة فوگ مكتوب مديرية التسجيل العقاري .

- هسه اشوفه

- ها عمو

- اي هاي .. وبيها النسر الجمهوري .. ووزارة العدل .

- اي عفية

- هسه اخذلها الصورة ..

- يالله راح ابقى وياج عالخط

- عمو .. اشو التلفون يگول المساحة ممتلئة .. وميقبل ياخذ صورة .. شنو يعني

- يعني امسحي من الصور مال تلفونچ واخذيها

- شنو امسح الصور .. كلها مال عيد ميلادي

- اجيبلچ كيكة اليوم من ابو عفيف.

- گول والله .

(طبعا الدائرة بالوزيرية صايرة .. الوزيرية كلها سمعتني وشافت الدخان اليطلع من اذاني وعبالهم الكهرباء احترگت )

- والله عمو .. والله اجيبلچ

اخيرا دزتها .. استنسختها .. رحت للدائرة لگيت بس الشرطي .. تعال باچر ..

وكلكم عيوني